samedi, août 05, 2006

Les patates in furie

Ch'est inne année à doryphores. Ch'est des tiotes biètes à costume rayé qui pondtent des oeufs padzou chés feuls ed pennetierre pou faire des jonnes. Après y macqutent chés feuls et chés truches al zattrappent el maladie, el mildiou qu'in dit. Alors chés patates al sont toutes taquées et al pourritent, pis cha fait du fien. Quind t'in prinds inne, tin dogt, y passe à travers, ch'est dégueulasse! Alors, putôt que d'traiter al pourette, in a puzieurs fachons d'combatte el vermine. In peut inl'ver chés fanes, in cope chés brindons et in y fout l'fu. O bien, t'es récoltes chés doryphors tous les jours, t'inlièffe chés feuls malates, duche qu'y des oeufs et pis t'es mets cha dins inne boîte in feralle et t'es fout l'fu aussi. Cha claque là dins, in dirot du pop corn!!! (In s'esscusse pou les âmes sensippes). Quind t'as fait tout cha, t'es peux prindes tin fourquet pou arracher patates. Mais surout, sourtout...t'es dos les laicher réchuer d'sus ch'terrain inne paire d'heures. Elles dotent faire leu furie, sinan elle vont cauffourrer et point pouvoir es conserver. Al z'es rinte insuite dins in indrot duche qui n'fait pas trop caud, qui a d'l'air et point linmière. Autermint ch'cops chi, al verditent et inne peut mi pu les minger. Un gardin ch'est bin, mais ch'est l'ouvrache! T'es sais quind même chouque t'es minges!!! Par ch'collectif des faiseux d'gardin Hemlenglois

Aucun commentaire: