mardi, juin 17, 2008

Les pulls cha gratte!

Les pulls, j'ai vraimint pas quaire cha! Les pulls cha gratte! Les pulls cha tient caud, après t'es in nache! Les pulls cha pique! Ch'est pas d'main l'veile que j'métro un pull!

lundi, juin 16, 2008

Sins raviser

Tricoteusse

J' larbeillos souvint quind elle étot à sin tricot.
El plupart du temps y'avot ses leunettes qui quaillotent
au bout d'sin nez.
Elles glissotent et du cop, elle arviétiot par aut'zeur.
Pindant ch'temps là, chés dogts yétotent à l'ouvrache.
Cha l'impêchot pa d'parler pis de t'raviser en même temps.
Al arivot même à surquer l'télé in allant!
J'comprénos point queumint al pouvot faire,
cha m'a toudis étonnée ch'truc là.

dimanche, juin 15, 2008

Des fos l'tricot, cha rind sot!

Tricot warrior

Des fos, vous savez quoi?
L'tricotache , cha rind in tiot peu maboul.
Quind té comminche inne neufe affaire
Y'a des cops, té sais mi pu t'arrêter.
Ch'est pire qu'inne drogue
T'in veux toudis pusse.
Au départ t'es t'attaques à des tiots trucs,
Du point mousse, ch'est classiq
Pis après v'la ti pas, qu'in fos qu'tas
Réussi tin cop, té veux armette cha.
Mais pu cha vient, pire eq ch'est.
T'in veux, toudis pusse, toudis pu vite
Cor pu compiqué...
T'es t'attaques à du lourd:
Du jacquard, des torsattes,
A ti l'jacquette ajourée, chés points fantaisie,
Chés nopes, chés points d'côte,
Pu rien y t'fait peur
points croisés, pull bitaclés, point in évental,
T'y va d'bon coeur
Tin nez dins tout l'journée,
T'es dins tes pinsées
Et tout ch' que t'a à dire
Ch'est , après, ch'finis min min rang...
Y'a pon a dire, l'tricotache
Ch'est pas mieux qu'inne console ed jeu!

Maille après maille

Du fil et d'zaiguils

Du fil et d'zaiguils,
Ch'est vrai qui n'in faut pas
gramint pusse pou queumincher
du tricotache, cha paraît simpe!
Seul'mint vlà,
Quind té veut ti mette, ch'est in aute paire
ed manches...
J'métot juré, de m'vie
ed pu toucher à cha.
Mais cha été pu fort eq mi.
In jour pon fait comme in aute,
j'ar eu l'invie d'armette cha,
mais j'chavos mi pu commint
un faijot pou mette in route.
In attindant d'tricoter l'première,
l'manche, ichi, ch'est mi!

Attiral

Ch'est mi graffe

Chétot quetcosse ed fascinant
de l'raviser faire sin tricotache.
Ses dogts y z'yallotent bon train.
Un cop padzou
Un cop par aut'zeur
Ch'fil ed laine dinsot, dins ses groets agiles .
In intindot l'bruit chés aiguils,
qui claquottent duch'mint l'inne d'sus l'aute...
Et pitit à ptit, in véyot arriver,
Chés côtes : in point à l'indrot, in point à l'invers.
Et pis après l'jersey : in ring à l'indrot, in ring à l'invers.
__"J'va faire un pull bin long pou l'tiot à Mazette, j'va l'faire bin long, l'aura bin caud à ses reins."
Pis quind ch'étot fini, et pis que ch'tricot y'étot bin trop grand, al dijot:
__"Ch'est mi rien, il mettra l'hiver qui vient".

samedi, juin 14, 2008

Mets tin dogt d' dins et saque ech fil!

Ch'est facile comme bonjour

Em grind mère ch'est cha qu'al dijot quind el parlot ed faire du tricotache. Un point à l'indrot, un à l'invers. Quint té sais cha t'es sais toute! Al n'avot toudis in tricot in route. A l' étot toudis à croiser l'fer A faire d'zaffaires pou ses jonnes! Quind ti parlot dès fos, al dijot: Tais-te, j'compte!

Tricotache