Collection

Sin père il étot toudis par monts et par vaués, ed ses voyaches y ramenot quind y pouvot, eune "poupée ed collection".

Comme chétot des "poupées ed collection", s'mère elle les mettot bien ringées précieusemint au fin fond d'un grind carton d'imballache. Y'étot point question ed faire mumusse avec. Chétot des "poupées ed collection", chétot pas n'importe quoué. Même qu'un biot jour pas fait comme in aute, es n'homme y prindro-t -y pas sin courache à deux mains pour aller quère du bo et faire li-même eune bielle étagère avec eune vitrine si qu'il est bin parti din s 'nouvrache.

Tout cha pour mette ed'sus "ché poupées ed collection". Et surtout, surtout in attindint ch'momint là, y fallot point mette ses pattes ed d'sus "ché poupées ed collection" pour point les abumées.

Ch'est d'ailleurs pour cha que dès que s'mère elle avot l'dos tournée l'femme, elle allot cafougner dinch carton à force plein d'poussières et d'arnitoiles! Elle pouvot alors raviser ed tout sin soul "ché poupées ed collection". Din leu boîte in plastique elle les véyot à travers et pu qu'elle les ravisot pu qu'elle pinsot "y n'a vraimint des drôles!".

Eune sacrées équipe ed pinbêches in vérité et pis cor des crâneusses avec leu biots habits, toutes leu dintelles et leu firlouppes...toutes autant qu'elles étotent!

Toutes sauf la Pompadour et Violette bien sûr.