Halage

Photo by Daniel

L'carbon d'chés pénichiers 6eme et dernier épisode...

 

Quind in arrivot à nous mason, in faizot l'partache du carbon. Chacun sin du, d'autin qu'in pouvot faire kekfos jusqu'à tros voyaches dins l'matinée. Ch'est pout ét'dire qu'in étot broyés quind in avot fini et in étot ter tous aussi crapés el 'uns qu' eul' auts !

Pindint tout ch'temps là, not mère elle avot fait cauffer de l'iau dins chés grindes bouilleuses à lessif, d'sus ch'fu dins l'buand'rie. Chacun sin tour in allot s'laver s'guiffe et cha n'étot pas point des manières. L'jus y'étot noir comme ed l'incre!

Pour finir, quind in étot rapropriés, in avot l'dro à l'apéro et cha faijot du bien dins tin gazio qu'iétot tout sec. In étot bin bénaches d'not journée, d'autint qu'cha n'avot pas coûté trop quer et qu'in avo d'quoi s'cauffer pou in bout d'temps.

Et aussi qu'in n's'étot point fait prinde par chés gardes du canal pache que ch'étot quind m^me in tiot peu de l'fraud, car ché pénichiers y n'avotent pas l'drot d'arvinde leu restant d'carbon et du coup, nous in avot pas l'drot de l'raquatter.

 

    Vlà ch'l'histoire,

            Ch'étot bin quind même...

 

D'après un texte écrit par  Pierrot

que j'armercie de s'aimappe participation.

 

 

 

Chemin

L'carbon d'chés pénichiers 5

Souvint, après avoir payé, ch'père Papegué y l' offrot un verre à ch'bistrot qu'iétot jusse in face.

Li, y croyot qu'in buvot comme tout l'monte, mais avec mes frères, in étot cor tout jonnes, et du vin rouche, cha n'étot pas grammint à not' goût ! Mais dins kek fos, y fallot bin, et cha passot quind même.

 

Après in artornnot avec note querke jusqu'à l'maison et in faisot l'quémin inverse. Mais là, cha n'étot pu l'même canchon! L'carette qu'iétot querquée comme eune baleine, y fallot l'faire avincher. Pour cha, min biau y juot les quévios d'trait. Y s'accrochot à chés brancards avec eune sangle devint s'poitrine, pis nous un passot à ch'cul pour l'assister du mieux qu'in pouvot.. L'pire, ch'est qu'in d'vot armonter l'crincone pour passer sus ch'pont. Cha grimpot sec et comme y pouvot y avoir chète à huit chints kilos d'carbon dins l'carette, cha n'étot point eune partie d'rigolache! Ch'biau y saquot comme un boeu et nouz'auts in poussot comme des damnés! In tirot tertous eune lingue ed tros mètes, tellemint qu'ch'étot dur!

In y arrivot quind même. Après cha ardéquindot pi chétot du plat, cha allot tout seu.

 

(à suivre)...

Pollen

Photo de Daniel

L'carbon d'chés pénichiers 4

 

Mais ch'étot kekfos cor pu dur, quind ch'carbon qu'iétot tout au fond de ch'bacquet.

 

Alors y fallot déchinte à l'équelle, querquer chés sacs pis les armonter in haut. Y fallot quind même  êtes costaud. J'te jure que cha n'étot pas eune partie d'plaisi que d'travailler dins des conditions parelles! Si y faijot biau, cha allot, mais quind y pleuvot, cha n'étot pu du tout l'même musique! Chés sacs y glichottent d'sus tin dos et y fallot bin les ténir pour pas les laicher querre.

 

Y'a aussi eune fos qu'in déposant chés sacs ed'carbon d'sus l'carette, qu'elle s'a déséquilibrée. Comme elle étot querquée jusqu'in hiau, min frère Gilbert, qu'iétot dins chés brancards, y n'les a pon lâchés, mais l'cul de l'carette y s'est artrouvé par tière et li du coup y pédalot dins l'vide, les gimbes in l'air. J'sais pas si té vos l'tableau, mais y'avot d'quoi rire quind même, sauf min biau qui n'arrêtot point d'couiner comme eune vide charnière:"T'es n'féras donc janmais attintion, fallot bin les ténir, chés brancards, avisses achteur t'as l'air fin à pédaler dins l'sémoule", et par tic et par tac...

Bien sûr, y'a fallu tout arquerquer chés sacs comme y faut et in faisant bin attintion cheule fos chi. Y'aurot pas fallu arqmincher l'même cinéma!

 

(à suivre)...

Ech quémin

L'carbon d'chés pénichiers 3

Ch'étot rigolo, pour aller deuch bacquet jusqu'à l'carette, y fallot marcher d'sus eune planque qui arliot l'péniche au quémin.

Elle étot posée d'sus eune équelle pour qu'elle so pu raite.

Té pinses, cha féjot du poids, d'autint pusse qu'min biau cha n'étot point eune mauviette, mais l'plinque al pliot quind même...si bin qu'in biau jour qui n'étot pas fait comme un aute, in est passé à deux d'sus planque avec nou sacs rimplis jusqu'à l'gueule. Cha n'a pas résisté et in s'est artrouvés tous les deux l'tro d'cul dins l'iau!!! Ch'biau y gueulot et y'étot tout frèque. Heureus'mint, in n's'est pas fait d'maux. Alors in a été quitte d'armonter chés sacs du fond de l'iau. Ch'étot lourd comme tout mais cha été quind même...

 

(à suivre)...

Tout du long de l'rife

L'carbon d'chés pénichiers 2

Et ch'est là queuch marinier qui nous disot chu qui fallot faire ou chu qu'in pouvot prinde.

Dins kek fos, y'avot du fin ou des poussières ed carbon, des fos des gaillettes et d'timps in timps, y'avot des nojettes. Ch'étot cha l'meilleu, mais cha coûtot pu quer!

Pas souvint, mais dins kek fos, ch'carbon y'étot stocké in hiau d'ech bacquet. Alors Papegué y'artirot chés écoutiles et in pouvot rimplir chés sacs.

Kré vingt diux, in hésitot pas à bin les carquer, mais ch'père y zieutot pour vire si in n'in mettot pas d'trop. Ket fos in n'armettot eune palée, ch'étot toudis cha d'gagné!

Si bien qu'chés sacs, y zavotte leu dose et cha féjot bin pusse eq 50 kilos, té peux m'croire!

 

Pi, quind chés sacs qu'iétotent rimplis, y'avot pu qu'à les mette d'sus sin dos et les porter jusqu'à l'balladeusse qu'iétot maint'nue par l'pu jonne ed'nouzotes tertous.

Y fallot raviser à équilibrer l'carette, sins quo, te n'pouvot mi l'ténir...

 

(à suivre)...

 

Canal

L'carbon d'chés pénichiers 1

Ouais mais, ch'est pas l'tout, y fallot l'quarrier ch'carbon !

J'ch'sais pas commint y z'ont fait, mais y z'ont du cacher un momint pour eusse trouver eune carette avec des grindes reules. In appelot cha eune baladeusse. Ch'étot eune carette in bos, avec un fond plat, des ridelles, des grindes reules et des branquards pour y mette un quva ou in bidet si qu'té préfères.

Pis l'matin in s'in allot vire ch'père Papegué au long de ch'canal.

Seulemint, cha n'étot pas si près qu'cha. Y'avot bin deux à tros kilomètes à faire el long de ch'quémin de halage. Y'avot même un momint du qui fallot monter eune crincone et passer d'sus un pont, pis ardéchinde d'l'aute côté pour  infin arriver a du qu'chés bacquets qu'iétotent amarrés.

Ch'étot incore des vielles péniches tout in bos, y'avot pas d'moteur. Pou les faire avincher, y fallot les saquer avec des cordes commes chés bateliers d'la Volga, ou bien i fallot les tirer avec un ou des bidets, ou incore, et chétot djà l'modernisme, chés péniches iétotent tirées par un tiot locotracteur...

 

(à suivre)...

O.O.O.O.O.O.O.O.O.O

L'carbon d'chés pénichiers

Ch'étot dins les années chinquante.

Avec min père et mes frères, au lieu d'aller glaner dins chés camps, comme gramint d'gins, nous in allot ker du carbon dins l'fond d'chés bacquets qu'iétotent amarrés tout l' long deuch canal, tout près qu'du qu'in habitot.

Faut bin dire qu'à ch't'époque là, comme y disot min père, y pouvot faire l'poirier, y'aurot pas eu eune pièche ed monnaie qu' ièrot qué-u  d'es poche! Y fallot bin qui s'arrinche avec em'mère pour cauffer l'baraque. T'es peux y'aller, quind ch'étot l'hiver, y'avot ed' quo claquer des dints dins ch'lit. Té t'serot cru in Sibérie tellemint qui féjot frod!!!

Alors, par dins quek fos, in allot ker du carbon à mont d'chés pénichiers. Cha s'faijot souvint l'samedi ou l'diminche avec mes gins et aussi avec min biau frère Jacques et quek fos un vosin qu'in appelot Jojo...

 

( à suivre )

O.O.O.O.O.O.O.O.O.O.O

Passe que...

Et si c'est pas passe que, ché s'ra passe tiète (chétot jusse inne parenthesse :)

Passe que toutes chés histoires qu'in raconte,

Qu'al suchent* hier ou d'achteur,

Chés toudis d' z'histoires d'un coin ou d'un aute,

D'un lopin d'tière, d'inne rue, d'in bout d'gardin,

Avec des gins par ichi ou d'par là,

Et tout cha incrinqué dins eune mémoire,

Inne tiote parchelle ed matière grisse.

Bin incrés dsus ch'plancher des vaques,

Au fil ed chés mots,

In oubli pétète el fil ed l'ieau.

L'ieau qui queurt el long des rifs,

Qui quinge ed nom selon chés villes.

Mais j'cros qu'y est timps d'laicher l'plache

A ch'Pierrot

Et a s'n'histoire ed carbon.

Ed carbon sur l'ieau, justemint....

* Ch'est ch'verp "ête", ach supjonctif présint, j'cros bin.

Envers sur Somme

Allez

Cor inne petiote pour chés adeptes de l'photo qui tranne...

 

En vert d'O

Patience...

Avant d'lancer ch'roman fleuve

Y m'faut invoyer deux tros photos

Tout spécialemint pour El Brayousse

Etint donné qu'al a quère vir troup!!!

-----------

Avant d'envoyer le roman fleuve

Il me faut poster deux ou trois photos

Tous spécialement pour La Brayousse*

Etant donné qu'elle aime voir trouble

La Brayousse= celle qui braye, qui crie...

Bordeau

Tant qu'à traîner ses guêtres...

In peut pétète aller faire un tiot crochet

Jusqu' amont Pierrot

Li, ch'est sûr, l' a toudis

Quetcosse à raconter.

L'a été vaccinné avec eune aiguille ed TSF!

In va s'faire payer un jus

Bien s'incrinquer dins chés fauteuls

Et in aura faut qu'à acouter

Co qui va cor nous invinter

Tais-te y'est djà in train busier

Et i va démarrer...

OOOOOOOOOO

Se relever?

C'est ce qu'il faudrait faire

Car nous n'avons pas terminé

Notre promenade

C'est qu'il y a tellement de choses à voir encore

Et il ne fait pas encore nuit

Il fait doux

Et à vrai dire, je n'ai guère envie de rentrer...

OOOOOOOOOO

S'rétamper?

Ch'est s'qu'y faudrot faire

Car in a pas fini note tour

Ch'est qui n'a cor des trucs à vir!

Et y n'fait pas cor soir

Ch'l'air il est doux

Et à vrai dire, j'a pas trop invie d'rintrer...

00000000000000000000000000000000000000

C'est ce qu'il faudrait faire

Car nous n'avons pas terminé notre tour

C'est qu'il en reste des choses à voir!

Et le soir n'est pas ecore tombé

L'air est doux

Et à vrai dire, je n'ai pas envie de rentrer...

Jules

Les tiots bancs

Ché toudis pratique un banc

Quind t'es là qu't'es promènes,

Et pis qu'd'un coup t'as invie d'un prinde chinque

T'es bin contint d'un treuver un.

Rassis comme un pain d'six lives

T'es t'posses, t'es pinses pas à grind cosse

T'es ravisses passer chés gins

Pis t'es là bien.

Et un tiot banc alors?

Un viu tiot banc des familes

Fabriqué par papy Emile (ou un aute)

Bin cha ch'est mieux incore.

Quind t'es tout jonnes

Qu'tas cor du lait au bout d'tin nez

Ch'est tout ch'qui faut pur découvrir

D'autes' horizons.

Monte là d'sus et t'es verras pas

Forchemint Montmartre,

Mais t'es pourras coller

D'guiffe al farniète quind y pleut déhors.

T'es pourras attrapper chés alleumettes,

Ou l'boîte à chuques

Aller t'assir trinquille

Dins un tiot coin.

Et t'mettes dins ch'gardin

Pis écosser des tiot pos....

In irot pas s'assir là?